«Хокукый киңлектә яшүсмер»: хокук дәресе (12+)

12 сентябрь көнне 15 нче санлы китапханә өлкән сыйныфлылар өчен «Хокукый киңлектә яшүсмер» дигән хокук дәресе уздырды. 

Чарада балалар хокуклар һәм вазифалар турында мәгълүматны тыңлады, балалар хокукларын яклауны тәэмин итүче документлар, мәкаләләр һәм оешмалар белән танышты, «Балаларның хокуклары һәм вазифалары» видеоязмасын карады.

Дәресне «Әкиятләрдә хокуклар» уены дәвам итте, анда яшүсмерләр, «Балалар хокуклары турында конвенция»гә нигезләнеп, әкият геройларының нинди хокуклары бозылуын ачыклады һәм әкият исемнәрен атады. 
Шулай ук «Башка булу хокукы» дигән китап күргәзмәсе әзерләнгән иде. Чара азагында балалар «Хокукый юлкүрсәткеч» дигән белешмә кәгазьләре алды.